ಬೆಂಗಳೂರು: 2025ರ ನೂತನ ವರ್ಷವನ್ನು ಸ್ವಾಗತಿಸಲು ರಾಜ್ಯ ರಾಜಧಾನಿ ಬೆಂಗಳೂರು ಸಜ್ಜಾಗಿದೆ. ಇಡೀ ನಗರದಾದ್ಯಂತ ಹೊಸ ವರ್ಷದ ಹುಮ್ಮಸ್ಸು ಎದ್ದು ಕಾಣುತ್ತಿದ್ದು, ತಡರಾತ್ರಿ ಪಾರ್ಟಿಗಳ ಆರಂಭಕ್ಕೆ ಯುವ ಜನತೆ ಕಾದು ಕುಳಿತಿದೆ. ರಾತ್ರಿ 12 ಗಂಟೆಯಾಗುವುದನ್ನೇ ಕಾಯುತ್ತಿರುವ ಲಕ್ಷಾಂತರ ಜನರು, ಹೊಸ ವರ್ಷದ ಸಂಭ್ರಮಾಚರಣೆಯ ಪ್ರಮುಖ ಸ್ಥಳಗಳಿಗೆ ನುಗ್ಗಲು ಕಾಯುತ್ತಿದ್ದಾರೆ.
ಜಾಹೀರಾತು
ಈ ಮಧ್ಯೆ ಉದ್ಯಾನನಗರಿ ಜನತೆಗೆ ಹೊಸ ವರ್ಷದ ಶುಭಾಶಯ ತಿಳಿಸಿರುವ ಬೆಂಗಳೂರು ನಗರ ಪೊಲೀಸರು, ಸಂಭ್ರಮಾಚರಣೆ ಭರದಲ್ಲಿ ಸುರಕ್ಷತೆ ಮರೆಯದಂತೆ ಜನರಲ್ಲಿ ಮನವಿ ಮಾಡಿದೆ.
ಈ ಕುರಿತು ತನ್ನ ಅಧಿಕೃತ ‘ಎಕ್ಸ್‌’ ಅಕೌಂಟ್‌ನಲ್ಲಿ ಟ್ವೀಟ್‌ ಮಾಡಿರುವ ಬೆಂಗಳೂರು ನಗರ ಪೊಲೀಸ್, “ಪಾರ್ಟಿ ಮಾಡಿ ಆದರೆ ಜಾಗರೂಕರಾಗಿರಿ! ಸುರಕ್ಷತೆಗೆ ಯಾವುದೇ ರಜೆಯು ಇಲ್ಲ, ಅದರೊಂದಿಗೆ ರಾಜಿಯು ಬೇಡ. ಈ ಸುರಕ್ಷತಾ ಸಲಹೆಗಳನ್ನು ಅನುಸರಿಸಿ ಮತ್ತು ತುರ್ತು ಪರಿಸ್ಥಿತಿಗಳಲ್ಲಿ #Namma112 ಕರೆ ಮಾಡಿ. ಈ ಮೂಲಕ ಸೂಕ್ತ ಮತ್ತು ಸಮಂಜಸ ಕಾರಣಗಳಿಗಾಗಿ ಸ್ಮರಣೀಯ ವರ್ಷವನ್ನಾಗಿ ಮಾಡೋಣ! ಹೊಸ ವರ್ಷದ ಶುಭಾಶಯಗಳು..” ಎಂದು ಹೇಳಿದೆ.
ಹೊಸ ವರ್ಷಾಚರಣೆ ವೇಳೆ ಪಾರ್ಟಿ ಮತ್ತಿತರ ಸಂಭ್ರಮಾಚರಣೆಗಳಿಗೆ ಯಾವುದೇ ಅಭ್ಯಂತರವಿಲ್ಲ ಎಂದಿರುವ ಬೆಂಗಳೂರು ಪೊಲೀಸ್, ಆದರೆ ಪಾರ್ಟಿ ನೆಪದಲ್ಲಿ ಕಾನೂನುಬಾಹಿರ ಚಟುವಟಿಕೆ ನಡೆಸಿದರೆ ಅಥವಾ ಈ ಪಾರ್ಟಿಗಳಿಂದ ಸಾರ್ವಜನಿಕರಿಗೆ ತೊಂದರೆಯಾದರೆ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್ಚರಿಸಿದೆ.
ಇದೇ ವೇಳೆ ಹೊಸ ವರ್ಷಾಚರಣೆ ಭರದಲ್ಲಿ ಕಾನೂನಿನ ಎಲ್ಲೆ ಮೀರುವ ಪ್ರಯತ್ನಗಳು ಬೇಡ ಎಂದು ನೇರವಾಗಿ ಎಚ್ಚರಿಸಿರುವ ಬೆಂಗಳೂರು ಪೊಲೀಸರು, ಅಂತಹ ಯಾವುದೇ ಪ್ರಯತ್ನಗಳನ್ನು ಕಟ್ಟುನಿಟ್ಟಾಗಿ ಹತ್ತಿಕ್ಕಲಾಗುವುದು ಎಂದು ಸ್ಪಷ್ಟಪಡಿಸಿದ್ದಾರೆ.
ಜಾಹೀರಾತು
1. ಮದ್ಯಪಾನ ಮಾಡಿ ವಾಹನ ಚಾಲನೆ ಮಾಡಬಾರದು. ಒಂದು ವೇಳೆ ಮದ್ಯಪಾನ ಮಾಡುವುದೇ ಆದರೆ ಚಾಲಕನನ್ನು ನೇಮಿಸಿಕೊಳ್ಳತಕ್ಕದ್ದು.
2. ಹೆಚ್ಚು ಜನಸಂದಣಿ ಇರುವ ಸ್ಥಳಗಳಲ್ಲಿ ಒಂದು ತಂಡವಾಗಿ ಓಡಾಡುವುದು ಮತ್ತು ಪರಸ್ಪರ ಕಾಳಜಿವಹಿಸುವುದು.
3. ಪಟಾಕಿ ಸಂಭ್ರಮಾಚರಣೆಗೆ ಸಂಬಂಧಿಸಿದಂತೆ ಸೂಕ್ತ ನಿಯಮಾವಳಿಗಳನ್ನು ಪಾಲಿಸಬೇಕು.
4. ಸಂಭ್ರಮಾಚರಣೆ ವೇಳೆ ನಿಮ್ಮ ಸುತ್ತಮುತ್ತಲಿನ ಆಗುಹೋಗುಗಳ ಬಗ್ಗೆ ಎಚ್ಚರವಹಿಸುವುದು.
5. ಯಾವುದೇ ತುರ್ತು ಸಂದರ್ಭದಲ್ಲಿ Namma112 ನಂಬರ್‌ಗೆ ಕರೆ ಮಾಡಿ ಪೊಲೀಸ್ ಸಹಾಯ ಪಡೆಯುವುದು
ಹೀಗೆ ಹೊಸ ವರ್ಷದ ಸಂಭ್ರಮಾಚರಣೆಗಾಗಿ ಜನತೆಯ ಸುರಕ್ಷತೆ ದೃಷ್ಟಿಯಿಂದ ಬೆಂಗಳೂರು ನಗರ ಪೊಲೀಸರು ನಿಯಮಾವಳಿಗಳನ್ನು ಜಾರಿ ಮಾಡಿದ್ದು, ಸಾರ್ವಜನಿಕರು ಈನಿಯಮಾವಳಿಗಳಿಗೆ ಅನುಸಾರವಾಗಿ ಸಂಭ್ರಮಾಚರಣೆ ನಡೆಸಬೇಕೆಂದು ಮನವಿ ಮಾಡಲಾಗಿದೆ.
ಜಾಹೀರಾತು
