ಆಧಾರ್ ಕಾರ್ಡ್ ಕಡ್ಡಾಯ ಮಾಡದಂತೆ ಸುಪ್ರೀಂ ಕೋರ್ಟ್ ತೀರ್ಪು/ಪತ್ರಿಕೆ, ಟಿವಿ ಜಾಹಿರಾತಿನ ಮೂಲಕ ಈ ವಿಷಯ ಜಾಹೀರು ಮಾಡಲು ಸೂಚನೆ-
ಪಡಿತರ, ಎಲ್ಪಿಜಿ ವ್ಯವಸ್ಥೆಗೆ ಆಧಾರ್ ಕಾರ್ಡ್ ಸಂಪರ್ಕ ಮಾಡಬಹುದು; ಆದರೆ ಸರಕಾರದ ಯಾವುದೇ ಜನಕಲ್ಯಾಣ ಕಾರ್ಯಕ್ರಮಗಳ ಲಾಭ ಪಡೆಯಲು ಆಧಾರ್ ಕಾರ್ಡ್ ಕಡ್ಡಾಯವಲ್ಲ ಎಂದು ಸುಪ್ರೀಂ ಕೋರ್ಟ್ ಮಹತ್ವದ ತೀರ್ಪು ನೀಡಿದೆ. ಆಧಾರ್ ಕಾರ್ಡ್ ಕಡ್ಡಾವಯಲ್ಲ ಎಂಬುದನ್ನು ಜಾಹಿರಾತಿನ ಮೂಲಕ ಜನರಿಗೆ ಮುಟ್ಟಿಸುವಂತೆಯೂ ನಿರ್ದೇಶಿಸಿದೆ.
ಆಧಾರ್ ಕಾರ್ಡ್‌ಗಾಗಿ ಸಂಗ್ರಹಿಸುವ ವ್ಯಕ್ತಿಯ ವೈಯಕ್ತಿಕ ಮಾಹಿತಿಗಳನ್ನು ಯಾವ ಪ್ರಾಧಿಕಾರಿಗಳ ಜತೆಗೂ ಹಂಚಿಕೊಳ್ಳದಂತೆಯೂ ಕೇಂದ್ರ ಸರಕಾರಕ್ಕೆ ಮಂಗಳವಾರ ಸೂಚಿಸಿದೆ.
ಜಾಹೀರಾತು
”ಅಪರಾಧ ತನಿಖೆ ಮಾಡಲು ಆಧಾರ್ ಕಾರ್ಡ್‌ನಲ್ಲಿರುವ ವೈಯಕ್ತಿಕ ಮಾಹಿತಿಗಳನ್ನು ಬಳಸಿಕೊಳ್ಳಬಹುದು. ಆದರೆ ಅದಕ್ಕೆ ಮುಂಚೆ ಕೋರ್ಟ್‌ನ ಅನುಮತಿ ಪಡೆಯಬೇಕು,” ಎಂದು ನ್ಯಾ. ಜೆ ಚಲಮೇಶ್ವರ್ ನೇತೃತ್ವದ ತ್ರಿಸದಸ್ಯ ಪೀಠ ಸ್ಪಷ್ಟಪಡಿಸಿತು.
ಆದರೂ, ಈಗ ನಡೆಯುತ್ತಿರುವ ಆಧಾರ್ ಕಾರ್ಡ್ ನೋಂದಣಿ ಕಾರ್ಯವನ್ನು ಸ್ಥಗಿತಗೊಳಿಸಬೇಕು ಎಂದು ಕೋರಿ ಸಲ್ಲಿಕೆಯಾಗಿದ್ದ ಅರ್ಜಿಗಳನ್ನು ವಿಚಾರಣೆಗೆ ಕೈಗೆತ್ತಿಕೊಳ್ಳಲು ನ್ಯಾ.ಎಸ್ ಎ ಬಾಬ್ಡೆ ಮತ್ತು ನ್ಯಾ. ಸಿ ನಾಗಪ್ಪನ್ ಅವರನ್ನೂ ಒಳಗೊಂಡು ಸುಪ್ರೀಂ ಪೀಠ ನಿರಾಕರಿಸಿತು.
ಜಾಹೀರಾತು
*ಖಾಸಗಿತನ ತಗಾದೆ ಸಾಂವಿಧಾನಿಕ ಪೀಠಕ್ಕೆ ಆಧಾರ್ ಕಾರ್ಡ್‌ಗಾಗಿ ವೈಯಕ್ತಿಕ ಮಾಹಿತಿಗಳನ್ನು ಸಂಗ್ರಹಿಸಲಾಗುತ್ತಿದ್ದು, ಇದರಿಂದ ಜನರ ಖಾಸಗಿತನಕ್ಕೆ ಧಕ್ಕೆಯಾಗುತ್ತಿದೆ. ಖಾಸಗಿತನವು ಮೂಲಭೂತ ಹಕ್ಕಾಗಿದ್ದು, ಆಧಾರ್ ಕಾರ್ಡ್ ಯೋಜನೆಯಲ್ಲಿ ಇದರ ಉಲ್ಲಂಘನೆಯಾಗುತ್ತಿದೆ ಎಂದು ದೂರಿ ಸಲ್ಲಿಕೆಯಾಗಿದ್ದ ಅರ್ಜಿಗಳ ಇತ್ಯರ್ಥವನ್ನು ಇದೇ ತ್ರಿಸದಸ್ಯ ಪೀಠವು ಸಾಂವಿಧಾನಿಕ ಪೀಠಕ್ಕೆ ವರ್ಗಾಯಿಸಿತು. ಖಾಸಗಿತನವು ಮೂಲಭೂತ ಹಕ್ಕು ಹೌದೋ ಅಲ್ಲವೋ ಎಂಬುದನ್ನೂ ಸಾಂವಿಧಾನಿಕ ಪೀಠ ನಿರ್ಣಯಿಸಲಿದೆ ಎಂದಿತು. ಈ ಹಿಂದೆ, ವಿಶಿಷ್ಟ ಗುರುತಿನ ಚೀಟಿ (ಆಧಾರ್ ಕಾರ್ಡ್) ಯೋಜನೆಯನ್ನು ಸಮರ್ಥಿಸಿಕೊಂಡಿದ್ದ ಸರಕಾರ, ಖಾಸಗಿತನವು ಜನರ ಮೂಲಭೂತ ಹಕ್ಕಲ್ಲ ಎಂದು ವಾದಿಸಿತ್ತು. ”ಖಾಸಗಿತನ ಮೂಲಭೂತ ಹಕ್ಕು ಎಂದು ಯಾವುದೇ ನ್ಯಾಯಾಲಯವೂ ಹೇಳಿಲ್ಲ. ಕಲಮು 21ರಲ್ಲೂ ಇದು ದಾಖಲಾಗಿಲ್ಲ. ಖಾಸಗಿತನ ಮೂಲಭೂತ ಹಕ್ಕಲ್ಲ ಎಂಬುದನ್ನು ಇದೇ ಸುಪ್ರೀಂ ಕೋರ್ಟ್‌ನ 6 ಮತ್ತು 8 ಸದಸ್ಯರ ಪೀಠಗಳು ನೀಡಿದ್ದ ತೀರ್ಪಿನಲ್ಲಿ ಉಲ್ಲೇಖವಾಗಿತ್ತು. ಆದರೆ, ಏಕ, ದ್ವಿ ಸದಸ್ಯರಿದ್ದ ಸಣ್ಣ ಪೀಠಗಳು ಇದಕ್ಕೆ ವ್ಯತಿರಿಕ್ತ ತೀರ್ಪು ನೀಡಿವೆ. ಆದ್ದರಿಂದ ಖಾಸಗಿತನ ಮೂಲಭೂತ ಹಕ್ಕೇ ಅಥವಾ ಅಲ್ಲವೇ ಎಂಬುದರ ಸ್ಪಷ್ಟತೆ ಬೇಕೆಂದರೆ ಈ ವಿಷಯವನ್ನು ಸಾಂವಿಧಾನಿಕ ಪೀಠಕ್ಕೆ ವಹಿಸುವುದು ಒಳಿತು,” ಎಂದು ಅಟಾರ್ನಿ ಜನರಲ್ ಮುಕುಲ್ ರೋಹತಗಿ ಅವರು ತ್ರಿಸದಸ್ಯ ಪೀಠದ ಮುಂದೆ ವಾದಿಸಿದ್ದರು. —
ನ್ಯಾಯಾಂಗ ನಿಂದನೆಗೆ ವಿರೋಧ ಆಧಾರ್ ಕಾರ್ಡ್ ಕಡ್ಡಾಯವಲ್ಲ ಎಂದು ಈ ಹಿಂದೆಯೇ ಕೋರ್ಟ್ ಸ್ಪಷ್ಟಪಡಿಸಿದ್ದರೂ, ವೇತನ ಪಾವತಿ, ಪಿಎಫ್ ವಿತರಣೆ, ಮದುವೆ ಹಾಗೂ ಆಸ್ತಿ ನೋಂದಣಿ ಸೇರಿ ಅನೇಕ ಸೌಲಭ್ಯಗಳಿಗೆ ಆಧಾರ್ ಕಾರ್ಡ್‌ಅನ್ನು ಹಲವು ರಾಜ್ಯಗಳು ಕಡ್ಡಾಯಗೊಳಿಸಿವೆ. ಹೀಗಾಗಿ ಕೇಂದ್ರ, ರಾಜ್ಯಗಳು, ಆರ್‌ಬಿಐ ಹಾಗೂ ಚುನಾವಣೆ ಆಯೋಗದ ವಿರುದ್ಧ ನ್ಯಾಯಾಂಗ ನಿಂದನೆ ಪ್ರಕ್ರಿಯೆ ಆರಂಭಿಸಬೇಕು ಎಂದು ಹಲವು ಸಾರ್ವಜನಿಕ ಹಿತಾಸಕ್ತಿ ಅರ್ಜಿಗಳು ಸಲ್ಲಿಕೆಯಾಗಿದ್ದವು. ಆದರೆ, ಆರ್‌ಬಿಐ, ಚುನಾವಣೆ ಆಯೋಗ ಮುಂತಾದ ಪ್ರಾಧಿಕಾರಗಳ ವಿರುದ್ಧ ನ್ಯಾಯಾಂಗ ನಿಂದನೆ ಖಟ್ಲೆ ದಾಖಲಿಸಲು ಕೇಂದ್ರ ವಿರೋಧ ವ್ಯಕ್ತಪಡಿಸಿತು. ”ಕೋರ್ಟ್ ಆದೇಶದ ಅನ್ವಯ ಯಾವುದೇ ಯೋಜನೆಯ ಫಲಾನುಭವಿಗಳಿಗೆ ಆಧಾರ್ ಕಾರ್ಡ್ ಕಡ್ಡಾಯ ಮಾಡಬೇಡಿ ಎಂದು ಈಗಾಗಲೇ ಸಂಬಂಧಿಸಿದ ಪ್ರಾಧಿಕಾರಗಳಿಗೆ ಸೂಚಿಸಲಾಗಿದೆ,” ಎಂದು ಹೆಚ್ಚುವರಿ ಸಾಲಿಸಿಟರ್ ಜನರಲ್ ಪಿಂಕಿ ಆನಂದ್ ಹೇಳಿದರು. —
*ಆಧಾರ್ ಕಾರ್ಡ್ ಇದ್ದವರು ಸವಲತ್ತುಗಳನ್ನು ಪಡೆಯುವಾಗ ಸಂಬಂಧಿಸಿದ ಪ್ರಾಧಿಕಾರಗಳಿಗೆ ನೀಡಿ ಎಂದು ಹೇಳಲಾಗಿದೆ. ಆದರೆ ಇದು ಐಚ್ಛಿಕವೇ ಹೊರತು ಕಡ್ಡಾಯವಲ್ಲ. -ಪಿಂಕಿ ಆನಂದ್ ಅಡಿಷನಲ್ ಸಾಲಿಸಿಟರ್ ಜನರಲ್ —
ಯಾವುದಕ್ಕೂ ಆಧಾರ ಬೇಕಿಲ್ಲ -ಜನಕಲ್ಯಾಣ ಯೋಜನೆಗಳ ಫಲಾನುಭವಿಗಳಾಗಲು ಆಧಾರ್ ಕಾರ್ಡ್ ಐಚ್ಛಿಕವೇ ಹೊರತು ಕಡ್ಡಾಯವಲ್ಲ
-ಪಡಿತರ, ಸೀಮೆಎಣ್ಣೆ, ಎಲ್ಪಿಜಿ ವಿತರಣೆ ವ್ಯವಸ್ಥೆಗೆ ಆಧಾರ್ ಸಂಖ್ಯೆ ಬೆಸೆಯಬಹುದು; ಆದರೆ ಆಧಾರ್ ಕಾರ್ಡ್ ಇಲ್ಲವೆಂದ ಮಾತ್ರಕ್ಕೆ ಈ ಸವಲತ್ತುಗಳನ್ನು ನಿರಾಕರಿಸುವಂತಿಲ್ಲ
-ಯಾವುದೇ ಕಾರಣಕ್ಕೂ ಆಧಾರ್ ಕಾರ್ಡ್‌ಗೆ ಕೊಟ್ಟಿರುವ ವೈಯಕ್ತಿಕ ಮಾಹಿತಿಗಳನ್ನು ಬೇರೊಬ್ಬರ ಜತೆ ಹಂಚಿಕೊಳ್ಳುವಂತಿಲ್ಲ
-ಅಪರಾಧದ ತನಿಖೆಯಲ್ಲಿ ಆಧಾರ್ ಕಾರ್ಡ್ ಮಾಹಿತಿ ಬಳಸಬಹುದಾದರೂ, ಇದಕ್ಕೆ ಕೋರ್ಟ್‌ನ ಪೂರ್ವಾನುಮತಿ ಅಗತ್ಯ
ಜಾಹೀರಾತು
