ಭುವನೇಶ್ವರ್: ಭಾರತೀಯ ಜನತಾ ಪಕ್ಷ ಒಡಿಶಾದಲ್ಲಿ ಕೇಸರಿ ಬಾವುಟ ಹಾರಿಸುವ ಸಾಧ್ಯತೆ ಕಾಣುತ್ತಿದೆ. ಲೋಕಸಭೆ ಚುನಾವಣೆಯ ಜೊತೆ ನಡೆದ ನಾಲ್ಕು ವಿಧಾನಸಭಾ ಚುನಾವಣೆಗಳಲ್ಲಿ ಒಡಿಶಾದೂ ಒಂದು. 147 ಸದಸ್ಯ ಬಲದ ಒಡಿಶಾ ವಿಧಾನಸಭೆಯಲ್ಲಿ ಬಹುಮತಕ್ಕೆ 74 ಸ್ಥಾನಗಳ ಅವಶ್ಯಕತೆ ಇದೆ. ಮಧ್ಯಾಹ್ನ 12 ಗಂಟೆಗೆ ಬಂದಿರುವ ಟ್ರೆಂಡ್ ಪ್ರಕಾರ ಬಿಜೆಪಿ 78 ಸ್ಥಾನಗಳಲ್ಲಿ ಮುನ್ನಡೆ ಪಡೆದಿದೆ. 2000ರಿಂದ 23 ವರ್ಷ ಕಾಲ ಸತತವಾಗಿ ಅಧಿಕಾರದಲ್ಲಿದ್ದ ಬಿಜೆಡಿ 54 ಸ್ಥಾನಗಳಲ್ಲಿ ಮುನ್ನಡೆ ಹೊಂದಿದೆ. ಕಾಂಗ್ರೆಸ್ ಪಕ್ಷ 11 ಸ್ಥಾನಗಳಲ್ಲಿ ಮಾತ್ರ ಮುನ್ನಡೆಯ ತೃಪ್ತಿ ಹೊಂದಿದೆ.
ಜಾಹೀರಾತು
ಒಡಿಶಾ ರಾಜ್ಯದಲ್ಲಿ ಹಿಂದಿನ 16 ವಿಧಾನಸಭೆಯಲ್ಲಿ ಬಿಜೆಪಿಯಾಗಲೀ ಅದರ ಹಿಂದಿನ ಅವತಾರವಾದ ಜನಸಂಘವಾಗಲೀ ಒಮ್ಮೆಯೂ ಅಧಿಕಾರ ಪಡೆದಿಲ್ಲ. ಈಗ 17ನೇ ವಿಧಾನಸಭೆಯಲ್ಲಿ ಮೊದಲ ಬಾರಿಗೆ ಆ ರಾಜ್ಯದಲ್ಲಿ ಕೇಸರಿ ಬಾವುಟ ಹಾರಾಡುವಂತಿದೆ.
ಜಾಹೀರಾತು
ಸತತ ಆರನೇ ಬಾರಿ ಚುನಾವಣೆ ಗೆಲ್ಲುವ ಬಿಜು ಜನತಾ ದಳದ ಆಸೆಗೆ ಬಿಜೆಪಿ ತಣ್ಣೀರು ಎರಚಿದಂತಿದೆ. 2000ರ ಚುನಾವಣೆಯಲ್ಲಿ ಬಿಜೆಪಿ 38 ಸ್ಥಾನಗಳನ್ನು ಗೆದ್ದಿತ್ತು. ಒಡಿಶಾ ಇತಿಹಾಸದಲ್ಲಿ ಬಿಜೆಪಿ ಅಷ್ಟು ಸ್ಥಾನಗಳನ್ನು ಗೆದ್ದಿದ್ದು ಅದರ ಗರಿಷ್ಠ ಮಟ್ಟವಾಗಿತ್ತು. 2004ರಲ್ಲಿ ಬಿಜೆಪಿ 32 ಸ್ಥಾನ ಜಯಿಸಿತ್ತು. ಅದಾದ ಬಳಿಕ ಬಿಜೆಪಿ ಈಗ ಸರ್ವಶ್ರೇಷ್ಠ ಪ್ರದರ್ಶನ ತೋರಿದೆ. ಎರಡು ದಶಕಗಳ ಬಿಜೆಡಿ ಆಡಳಿತವನ್ನು ಬಿಜೆಪಿ ಕೊನೆಗಾಣಿಸುತ್ತಿದೆ.
ಜಾಹೀರಾತು
2000ರಲ್ಲಿ ಬಿಜೆಡಿ ಅಧಿಕಾರ ಹಿಡಿಯುವ ಮುನ್ನ ನಡೆದ 11 ಚುನಾವಣೆಯಲ್ಲಿ ಎಂಟು ಬಾರಿ ಕಾಂಗ್ರೆಸ್ ಪಕ್ಷ ಗೆದ್ದು ಅಧಿಕಾರ ಪಡೆದಿತ್ತು. ಜನತಾ ಪಕ್ಷ 1977ರಲ್ಲಿ ಅಧಿಕಾರಕ್ಕೆ ಬಂದಿತು. 2000ರ ಹೊತ್ತಿಗೆ ಜನತಾ ಪಕ್ಷ ವಿವಿಧ ಹೋಳುಗಳಾಗಿ ಕೊನೆಗೆ ಬಿಜು ಜನತಾ ದಳ ಒಡಿಶಾದಲ್ಲಿ ನೆಲೆ ನಿಂತಿತು. 2000ರಿಂದ 23 ವರ್ಷ ಕಾಲ ನವೀನ್ ಪಾಟ್ನಾಯಕ್ ನೇತೃತ್ವದಲ್ಲಿ ಬಿಜೆಡಿ ಸತತವಾಗಿ ಆಡಳಿತ ನಡೆಸಿ ಇತಿಹಾಸ ಸೃಷ್ಟಿಸಿತ್ತು. ಈಗ ಬಿಜೆಪಿಯಿಂದ ಹೊಸ ಅಧ್ಯಾಯ ಆರಂಭವಾಗುತ್ತಿದೆ. ಒಡಿಶಾದಲ್ಲಿ ಐದು ಅವಧಿ ಸಿಎಂ ಆಗಿದ್ದ ನವೀನ್ ಪಾಟ್ನಾಯಕ್ ಅವರು ರಾಜ್ಯದಲ್ಲಿ ದೊಡ್ಡ ಮಟ್ಟದಲ್ಲಿ ಮೋಡಿ ಮಾಡಿದ್ದರು. ಭ್ರಷ್ಟಾಚಾರ ಸೇರಿದಂತೆ ಯಾವುದೇ ಕಳಂಕ ಇಲ್ಲದೆ ಸ್ವಚ್ಛ ಆಡಳಿತವನ್ನು ಪಾಟ್ನಾಯಕ್ ನೀಡಿದ್ದರು.
ಜಾಹೀರಾತು
ಜಾಹೀರಾತು
ಜಾಹೀರಾತು
