ನವದೆಹಲಿ: ಶೇ 20ರಷ್ಟು ಎಥೆನಾಲ್ ಮಿಶ್ರಿತ ಪೆಟ್ರೋಲ್ ಅನ್ನು ಪರಿಚಯಿಸುವ ಬಗ್ಗೆ ಕರ್ನಾಟಕ ಕಾಂಗ್ರೆಸ್ ಅಧ್ಯಕ್ಷ ಬಿಕೆ ಹರಿಪ್ರಸಾದ್ ಅವರು ಶನಿವಾರ ಕೇಂದ್ರ ಸರ್ಕಾರವನ್ನು ಪ್ರಶ್ನಿಸಿದ್ದಾರೆ. ಇದು ವಾಹನ ಸ್ಥಗಿತಕ್ಕೆ ಕಾರಣವಾಗುತ್ತಿದೆ, ಮೈಲೇಜ್ ಕಡಿಮೆ ಮಾಡುತ್ತಿದೆ ಮತ್ತು ಗ್ರಾಹಕರಿಗೆ ನಿರ್ವಹಣಾ ವೆಚ್ಚವನ್ನು ಹೆಚ್ಚಿಸುತ್ತಿದೆ ಎಂದು ಆರೋಪಿಸಿದ್ದಾರೆ.
X ನಲ್ಲಿ ಪೋಸ್ಟ್ ಮಾಡಿರುವ ಹರಿಪ್ರಸಾದ್, E20 ಇಂಧನ ಬಿಡುಗಡೆಯಾದ ನಂತರ ದೇಶದಾದ್ಯಂತ ವಾಹನ ಚಾಲಕರು ವ್ಯಾಪಕ ಸಮಸ್ಯೆಗಳನ್ನು ಎದುರಿಸುತ್ತಿದ್ದಾರೆ ಎಂದು ಹೇಳಿದ್ದಾರೆ.
‘ಶೇ 20ರಷ್ಟು ಎಥೆನಾಲ್ ಮಿಶ್ರಿತ ಪೆಟ್ರೋಲ್ ಪರಿಚಯಿಸಿದ ನಂತರ ವಾಹನಗಳು ಹಾಳಾಗುತ್ತಿವೆ ಮತ್ತು ಮೈಲೇಜ್‌ನಲ್ಲಿ ತೀವ್ರ ಕುಸಿತವಾಗಿದೆ ಎಂಬ ವ್ಯಾಪಕ ವರದಿಗಳು ಲೆಕ್ಕವಿಲ್ಲದಷ್ಟು ವಾಹನ ಮಾಲೀಕರನ್ನು ನಿರಾಶೆಗೊಳಿಸುತ್ತಿವೆ ಮತ್ತು ಹೆಚ್ಚಿನ ನಿರ್ವಹಣಾ ವೆಚ್ಚದ ಹೊರೆಯನ್ನು ಎದುರಿಸುತ್ತಿವೆ’ ಎಂದು ಅವರು ಪೋಸ್ಟ್ ಮಾಡಿದ್ದಾರೆ.
‘ಇಂಧನ ಬೆಲೆಗಳನ್ನು ಕಡಿಮೆ ಮಾಡುವ ಬದಲು, ನರೇಂದ್ರ ಮೋದಿ ಸರ್ಕಾರವು ಎಥೆನಾಲ್ ಮಿಶ್ರಣವನ್ನು ಹೆಚ್ಚಿಸಿ, ಅದರ ವೆಚ್ಚದ ಹೊರೆಯನ್ನು ಸಾಮಾನ್ಯ ನಾಗರಿಕರ ಮೇಲೆ ಹೊರಿಸಿದೆ. ಕಡಿಮೆ ಮೈಲೇಜ್ ಮತ್ತು ದುರಸ್ತಿ ವೆಚ್ಚಗಳ ಹೊರತಾಗಿಯೂ ಜನರು ಇಂಧನಕ್ಕಾಗಿ ಅದೇ ಅಥವಾ ಅದಕ್ಕಿಂತ ಹೆಚ್ಚಿನ ಬೆಲೆಯನ್ನು ಪಾವತಿಸುತ್ತಿದ್ದಾರೆ. ಈ ಗಂಭೀರ ಪ್ರಶ್ನೆಗಳಿಗೆ ಉತ್ತರ ಸಿಗಲೇಬೇಕು. ಇದೊಂದು ಹಗರಣ’ ಎಂದು ಹರಿಪ್ರಸಾದ್ ಆರೋಪಿಸಿದರು.
ಇದಕ್ಕೂ ಮೊದಲು, ಆಮ್ ಆದ್ಮಿ ಪಕ್ಷದ (ಎಎಪಿ) ರಾಷ್ಟ್ರೀಯ ಸಂಚಾಲಕ ಅರವಿಂದ ಕೇಜ್ರಿವಾಲ್ ಶುಕ್ರವಾರ ಕೂಡ, ಕೇಂದ್ರವು ಜನರ ಮೇಲೆ ಬಲವಂತವಾಗಿ ಇ20 ಪೆಟ್ರೋಲ್ ಹೇರುತ್ತಿದೆ. ಇದು ವಾಹನಗಳಿಗೆ ಹಾನಿಯನ್ನುಂಟುಮಾಡುತ್ತಿದೆ ಮತ್ತು ಇಂಧನ ದಕ್ಷತೆಯನ್ನು ಕಡಿಮೆ ಮಾಡುತ್ತಿದೆ ಎಂದು ದೂರಿದ್ದರು.
X ನಲ್ಲಿ ವಿಡಿಯೋ ಪೋಸ್ಟ್ ಹಂಚಿಕೊಂಡ ಕೇಜ್ರಿವಾಲ್, ‘ಇಡೀ ದೇಶವು ಮೋದಿ ಸರ್ಕಾರಕ್ಕೆ ಪ್ರಾಯೋಗಿಕ ಪ್ರಯೋಗಾಲಯವಾಗಿದೆ. E20 ಪೆಟ್ರೋಲ್ ಅನ್ನು ಜನರ ಮೇಲೆ ಬಲವಂತವಾಗಿ ಹೇರಲಾಗುತ್ತಿದೆ. ಎಥೆನಾಲ್ ನಿಂದಾಗಿ ಜನರ ವಾಹನಗಳು ಕೆಟ್ಟುಹೋಗುತ್ತಿವೆ, ಬಿಡಿಭಾಗಗಳು ಹಾನಿಗೊಳಗಾಗುತ್ತಿವೆ ಮತ್ತು ಮೈಲೇಜ್ ಕುಸಿಯುತ್ತಿದೆ. ಜನರು ತೀವ್ರವಾಗಿ ಕೋಪಗೊಂಡಿದ್ದಾರೆ’ ಎಂದು ಹೇಳಿದರು.
‘ಜನರು ಇದನ್ನು ವಿರೋಧಿಸುತ್ತಿರುವಾಗ, ನೀವು ಏಕೆ ಅವರ ಮೇಲೆ ಇದನ್ನು ಹೇರುತ್ತಿದ್ದೀರಿ? ಇದನ್ನು ಏಕೆ ಹಿಂಪಡೆಯುತ್ತಿಲ್ಲ? ನಿಮಗೆ ಮತ ನೀಡಿದವರು ಜನರೇ. ಅವರ ಮತವನ್ನು ಗೌರವಿಸುವುದು ಮತ್ತು ಅವರ ಮಾತನ್ನು ಆಲಿಸುವುದು ನಿಮ್ಮ ಕರ್ತವ್ಯ’ ಎಂದು ಹೇಳಿದರು.
ಜಾಹೀರಾತು
ಜಾಹೀರಾತು
ಜಾಹೀರಾತು
