ಪುತ್ತೂರು: ಇತ್ತ ಖ್ಯಾತ ನಟ ಕಿಚ್ಚ ಸುದೀಪ್ ಕಲರ್ಸ್ ಕನ್ನಡ ವಾಹಿನಿಯಲ್ಲಿ ನಡೆಸಿ ಕೊಡುತ್ತಿರುವ ಬಿಗ್ಬಾಸ್ ಕಾರ್ಯಕ್ರಮ ಮನೆ ಮಾತಾಗಿದೆ. ಅತ್ತ ತೆಲುಗು ಬಿಗ್ಬಾಸ್ನಲ್ಲಿ ಸ್ಪರ್ಧಿಸಿರುವ ಕೋಡಿಂಬಾಡಿ ಮೂಲದ ಚೈತ್ರ ರೈ ಮನೆ ಮಾತಾಗುತ್ತಿದ್ದಾರೆ.
ಜಾಹೀರಾತು
ಅಕ್ಕಿನೇನಿ ನಾಗಾರ್ಜುನ ಅವರು ಸ್ಟಾರ್ ಮಾ ಚಾನೆಲ್ನಲ್ಲಿ ಸೆ.6ರಿಂದ ನಡೆಸಿ ಕೊಡುತ್ತಿರುವ ತೆಲುಗು ಬಿಗ್ಬಾಸ್ ಸೀಸನ್ 10ರಲ್ಲಿ ಖ್ಯಾತ ಕಿರುತೆರೆ ನಟಿಯಾಗಿರುವ ಕೋಡಿಂಬಾಡಿ ಮೂಲದ ಚೈತ್ರ ರೈ ಭಾಗವಹಿಸುತ್ತಿದ್ದು ಗಮನ ಸೆಳೆಯುತ್ತಿದ್ದಾರೆ. ಪ್ರಮುಖರಾದ ಡೆಬ್ಬಾನಿ ಮೋಡಕ್, ವರ್ಷಿಣಿ ಸೌಂದರರಾಜನ್, ಮುಕೇಶ್ ಗೌಡ, ಕೃಷ್ಣುಡು, ತ್ರಿಗುಣ್, ಟೆಂಪರ್ ವಂಶಿ, ಅಟೋ ರಾಮ್ಪ್ರಸಾದ್, ನರೇಶ್, ಗುಂಡೇಬೋಯಿನ ಜಾನ್ಸಿ, ಆರ್ಜೆ ಚರಣ್, ಸುಧೀರ್ ಕುಮಾರ್, ಅಮಾನ್, ಸೃಷ್ಟಿ ವ್ಯಾಕರಣಂ, ರೋಹಿತ್ ನಾಯ್ಡು, ಶಾಲಿನಿ ಮುಂತಾದ ಘಟಾನುಘಟಿಗಳೊಂದಿಗೆ ಚೈತ್ರಾ ರೈ ಸ್ಪರ್ಧಿಸುತ್ತಿದ್ದಾರೆ.
ಜಾಹೀರಾತು
ಕನ್ನಡ ಮತ್ತು ತೆಲುಗು ಕಿರುತೆರೆಯ ಹಲವಾರು ಧಾರವಾಹಿಗಳಲ್ಲಿ ಮಿಂಚಿರುವ ಚೈತ್ರಾ ರೈ ಅವರು ಪುತ್ತೂರು ತಾಲೂಕಿನ ಕೋಡಿಂಬಾಡಿ ಗ್ರಾಮದ ಮಠಂತಬೆಟ್ಟು ಸಂಪಿಗೆದಡಿ ಮೂಲದವರು. ಸಂಪಿಗೆದಡಿಯ ಗುಲಾಬಿ ವಾಸು ರೈ ಮತ್ತು ಬೆಳ್ತಂಗಡಿ ತಾಲೂಕಿನ ಧರ್ಮಸ್ಥಳ ಸಮೀಪದ ದೊಂಡೋಲೆಯ ವಾಸು ರೈ ಅವರ ಪುತ್ರಿ ಚೈತ್ರ ರೈ ತಮ್ಮ ತರವಾಡು ಮನೆಯಾದ ಪೆರ್ನೆ ಸಮೀಪದ ಬಿಳಿಯೂರು ಗ್ರಾಮದ ತಿಪ್ಪಕೋಡಿಯಲ್ಲಿ ನಡೆಯುವ ದೈವ ದೇವರ ಕಾರ್ಯಕ್ರಮದಲ್ಲಿ ಪ್ರತೀ ವರ್ಷವೂ ಭಾಗಿಯಾಗುತ್ತಿದ್ದಾರೆ. ಅಲ್ಲದೆ ತನ್ನ ಅಜ್ಜಿ ಮನೆಯಾದ ಸಂಪಿಗೆದಡಿಗೆ ಆಗಾಗ ಭೇಟಿ ನೀಡುತ್ತಿರುವ ಇವರು ಮಠಂತಬೆಟ್ಟು ಶ್ರೀ ಮಹಿಮಷರ್ದಿನಿ ದೇವಸ್ಥಾನದ ಬ್ರಹ್ಮಕಲಶೋತ್ಸವದ ಸಂಭ್ರಮದಲ್ಲಿಯೂ ಭಾಗಿಯಾಗಿದ್ದರು.
ಜಂಬೂ ಸವಾರಿ ಕನ್ನಡ ಚಲನಚಿತ್ರ ಮತ್ತು ತೆಲುಗಿನ ಜೂನಿಯರ್ ಎನ್ಟಿಆರ್ ನಟಿಸಿರುವ ಬಿಗ್ ಬಜೆಟ್ನ ದೇವರ ಭಾಗ-1ರಲ್ಲಿ ಮಿಂಚಿರುವ ಚೈತ್ರ ರೈ ಅವರು ಕನ್ನಡದ ಕುಸುಮಾಂಜಲಿ, ಬೊಂಬೆಯಾಟವಯ್ಯ, ಗೆಜ್ಜೆಪೂಜೆ, ಬಣ್ಣದ ಬುಗುರಿ, ರಾಧಾ ಕಲ್ಯಾಣ, ಯುಗಾದಿ, ಪೌರ್ಣಮಿ ಸಹಿತ ಹಲವು ಧಾರವಾಹಿಗಳಲ್ಲಿಯೂ ಗಮನ ಸೆಳೆದಿದ್ದಾರೆ.
ತೆಲುಗಿನ ಅಷ್ಟಚಮ್ಮ, ಅಲಾ ಮೊದಲಾಯಿಂದಿ, ಅಟ್ಟೋ ಅಟ್ಟಮ್ಮ ಕುತ್ರೋ, ಒಕ್ಕರಿಕಿ ಒಕ್ಕರು, ದಟ್ ಈಸ್ ಮಹಾಲಕ್ಷ್ಮಿ, ಮನಸುನ ಮನಸಾಯಿ, ಅಟ್ಟರಿಂಟ್ಲೋ ಅಕ್ಕ ಚೆಲ್ಲೆಲು, ರಾಧಾ ನೀವೆರ ಪ್ರಣಂ ಮುಂತಾದ ಧಾರವಾಹಿಗಳಲ್ಲಿ ಪ್ರಮುಖ ಪಾತ್ರ ನಿರ್ವಹಿಸಿದ್ದಾರೆ.
ತೆಲುಗು ಕಿರುತೆರೆಯ ನಂಬರ್ ವನ್ ನಟಿಯಾಗಿರುವ ಚೈತ್ರ ರೈ ಇದೀಗ ಬಿಗ್ಬಾಸ್ನಲ್ಲಿ ಕಮಾಲ್ ಮಾಡುತ್ತಿದ್ದಾರೆ. ಮಡಿಕೇರಿ ಮತ್ತು ಬೆಂಗಳೂರುನಲ್ಲಿ ವಿದ್ಯಾಭ್ಯಾಸ ಮಾಡಿರುವ ಚೈತ್ರ ರೈ ಅವರು ಉಡುಪಿ ಮೂಲದವರಾದ ಪತಿ ಪ್ರಸನ್ನ ಶೆಟ್ಟಿ ಮತ್ತು ಈರ್ವರು ಪುಟ್ಟ ಹೆಣ್ಣು ಮಕ್ಕಳೊಂದಿಗೆ ಹೈದರಾಬಾದ್ನಲ್ಲಿ ವಾಸವಿದ್ದಾರೆ. ತನ್ನ ಹತ್ತು ತಿಂಗಳ ಹೆಣ್ಣು ಮಗುವನ್ನು ಪತಿಯ ಸುಪರ್ದಿಗೆ ಒಪ್ಪಿಸಿ ಅವರು ಬಿಗ್ಬಾಸ್ನಲ್ಲಿ ಭಾಗಿಯಾಗಿದ್ದಾರೆ.
