ಪುತ್ತೂರು: ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಮನೆ ಕಟ್ಟುವವರಿಗೆ ಕೆಂಪು ಕಲ್ಲಿನ ಬೆಲೆ ಏರಿಕೆ ಒಂದು ದೊಡ್ಡ ತಲೆನೋವಾಗಿ ಪರಿಣಮಿಸಿದೆ. ಕೆಲವು ತಿಂಗಳ ಹಿಂದೆ ದಿಢೀರ್ ಎಂದು ಕೆಂಪು ಕಲ್ಲಿನ ದರ ಪ್ರತಿ ಕಲ್ಲಿಗೆ 20 ರೂ. ಏರಿಕೆಯಾಗಿತ್ತು, ಅಷ್ಟೇ ಅಲ್ಲದೆ, ಬೇಕಾದಷ್ಟು ಕಲ್ಲು ಸಿಗುವುದೂ ಕಷ್ಟವಾಗಿತ್ತು.
ಈಗ ಸರ್ಕಾರವು ಕೆಂಪು ಕಲ್ಲಿನ ಮೇಲಿನ ರಾಜಸ್ವವನ್ನು ಇಳಿಸಿದ್ದರೂ, ಕಲ್ಲಿನ ದರ ಮಾತ್ರ ನಿರೀಕ್ಷಿತ ಮಟ್ಟದಲ್ಲಿ ಇಳಿದಿಲ್ಲ. ಇದು ಹೊಸದಾಗಿ ಮನೆ ಕಟ್ಟಲು ಹೊರಟವರ ಆಸೆಗೆ ತಣ್ಣೀರೆರಚಿದಂತಾಗಿದೆ.
ಈ ಸಮಸ್ಯೆ ಉದ್ಭವಿಸಿದ್ದು ಹೇಗೆ? ಕೆಲ ತಿಂಗಳ ಹಿಂದೆ ರಾಜ್ಯ ಸರ್ಕಾರವು ಕೆಂಪು ಕಲ್ಲು ಗಣಿಗಾರಿಕೆ ಮತ್ತು ಪೂರೈಕೆ ಮಾಡುವವರಿಗೆ ಪರವಾನಗಿ ಪಡೆಯುವುದನ್ನು ಕಡ್ಡಾಯಗೊಳಿಸಿ, ಕಲ್ಲಿನ ಮೇಲಿನ ರಾಜಸ್ವವನ್ನು ಒಂದು ಟನ್‌ಗೆ 76 ರೂ.ಗಳಿಂದ 256 ರೂ.ಗಳಿಗೆ ಏರಿಸಿತ್ತು ಇದು ಕೆಂಪು ಕಲ್ಲು ಉದ್ಯಮಕ್ಕೆ ದೊಡ್ಡ ಹೊಡೆತ ನೀಡಿತು.
ರಾಜಸ್ವ ಹೆಚ್ಚಳದಿಂದಾಗಿ ಜಿಲ್ಲೆಯಲ್ಲಿ ಕಲ್ಲಿನ ಪೂರೈಕೆ ಸಂಪೂರ್ಣವಾಗಿ ಸ್ಥಗಿತಗೊಂಡಿತು. 6 ತಿಂಗಳಿಗೊಮ್ಮೆ ಪರವಾನಗಿ ನವೀಕರಿಸುವ ಹಳೆಯ ಪದ್ಧತಿ ಇದ್ದ ಕಾರಣ, ಹೊಸ ನಿಯಮಗಳು ಜಾರಿಗೆ ಬಂದಾಗ ಯಾರೂ ನವೀಕರಣಕ್ಕೆ ಆಸಕ್ತಿ ತೋರಲಿಲ್ಲ.
ಪ್ರತಿಭಟನೆ ಮತ್ತು ರಾಜಸ್ವ ಇಳಿಕೆ: ಹೆಚ್ಚಿದ ರಾಜಸ್ವದ ವಿರುದ್ಧ ದೊಡ್ಡ ಪ್ರಮಾಣದ ಪ್ರತಿಭಟನೆಗಳು ನಡೆದವು. ಸಾರ್ವಜನಿಕರ ಒತ್ತಡಕ್ಕೆ ಮಣಿದ ಸರ್ಕಾರವು ಹೊಸ ನೀತಿಯನ್ನು ಜಾರಿಗೊಳಿಸಿ, ರಾಜಸ್ವವನ್ನು 256 ರೂ.ಗಳಿಂದ 100 ರೂ.ಗಳಿಗೆ ಇಳಿಸಿತು.
ಜಾಹೀರಾತು
ಇದು ಕಲ್ಲು ಉದ್ಯಮಿಗಳ ಬಹುದಿನಗಳ ಬೇಡಿಕೆಯಾಗಿತ್ತು. ಆದರೆ, ಪರವಾನಗಿ ಅವಧಿಯನ್ನು 6 ತಿಂಗಳಿಂದ 2 ವರ್ಷಕ್ಕೆ ಏರಿಸಬೇಕೆಂಬ ಬೇಡಿಕೆಗೆ ಭಾಗಶಃ ಮಾತ್ರ ಮನ್ನಣೆ ದೊರೆತು, ಅದನ್ನು 10 ತಿಂಗಳಿಗೆ ಸೀಮಿತಗೊಳಿಸಲಾಯಿತು.
ಕಾಸರಗೋಡು ಗಂಟುಬಿದ್ದ ಸಮಸ್ಯೆ: ದಕ್ಷಿಣ ಕನ್ನಡಕ್ಕೆ ಹೆಚ್ಚಾಗಿ ಕೆಂಪು ಕಲ್ಲು ಕಾಸರಗೋಡು ಜಿಲ್ಲೆಯಿಂದ ಬರುತ್ತದೆ. ಕೇರಳದಲ್ಲಿ ಕಲ್ಲಿನ ಗಣಿಗಾರಿಕೆ ನಿಯಮಗಳು ಕರ್ನಾಟಕಕ್ಕಿಂತ ಸರಳವಾಗಿವೆ. ಅಲ್ಲಿ ಒಂದು ನಿರ್ದಿಷ್ಟ ವಿಸ್ತೀರ್ಣದ ಕೋರೆಯಿಂದ ಸುಮಾರು 24,000 ಟನ್ ಕಲ್ಲು ತೆಗೆಯಲು ಅನುಮತಿಯಿದ್ದರೆ, ದಕ್ಷಿಣ ಕನ್ನಡದಲ್ಲಿ ಅಷ್ಟೇ ವಿಸ್ತೀರ್ಣದಿಂದ ಕೇವಲ 2,000 ಟನ್ ಕಲ್ಲು ತೆಗೆಯಲು ಮಾತ್ರ ಪರವಾನಗಿ ಇದೆ. ಅಂದರೆ, ಕಡಿಮೆ ರಾಜಸ್ವದಲ್ಲಿ ಕೇರಳದಲ್ಲಿ ಹೆಚ್ಚಿನ ಪ್ರಮಾಣದ ಕಲ್ಲು ತೆಗೆಯಲು ಸಾಧ್ಯವಿದೆ.
ಹಿಂದೆ ಕಾಸರಗೋಡಿನಿಂದ ಕಲ್ಲು ಸರಾಗವಾಗಿ ದಕ್ಷಿಣ ಕನ್ನಡಕ್ಕೆ ಬರುತ್ತಿತ್ತು. ಆದರೆ, ಈಗ ದಕ್ಷಿಣ ಕನ್ನಡದಲ್ಲಿ ಪರವಾನಗಿ ನಿಯಮಗಳು ಬಿಗಿಗೊಂಡಿರುವುದರಿಂದ ಕಾಸರಗೋಡು ಭಾಗದಿಂದ ಕಲ್ಲು ತರುವುದು ದುಬಾರಿಯಾಗಿದೆ. ಕಾಸರಗೋಡಿನ ಪರ್ಮಿಟ್ ದಾರರಿಗೆ ಪ್ರತಿ ಎರಡು ಲೋಡ್ ಕಲ್ಲಿಗೆ 6,000 ರೂ. ನೀಡಬೇಕಾಗುತ್ತದೆ. ಇದರಿಂದ ಸಾಗಾಟ ವೆಚ್ಚ ಹೆಚ್ಚಾಗಿ, ದಕ್ಷಿಣ ಕನ್ನಡದಲ್ಲಿ ಕಲ್ಲಿನ ದರ ಏರಿಕೆಯಾಗಲು ಮತ್ತೊಂದು ಕಾರಣವಾಗಿದೆ.
ದರ ಇಳಿಯದಿರುವುದಕ್ಕೆ ಕಾರಣಗಳು: ರಾಜಸ್ವ ಇಳಿಕೆಯಾದರೂ ದರ ಇಳಿಯದಿರುವುದಕ್ಕೆ ಹಲವು ಕಾರಣಗಳಿವೆ. ಮೊದಲನೆಯದಾಗಿ, ದಕ್ಷಿಣ ಕನ್ನಡದಲ್ಲಿ ಬೇಡಿಕೆಗೆ ತಕ್ಕಷ್ಟು ಕಲ್ಲು ಸಿಗುತ್ತಿಲ್ಲ. ಹಿಂದೆ 16 ಪರವಾನಗಿದಾರರಿದ್ದರೆ, ಈಗ ಕೇವಲ 7 ಮಂದಿ ಮಾತ್ರ ಪರವಾನಗಿ ಪಡೆದಿದ್ದಾರೆ. ಜಿಲ್ಲೆಯ ಒಟ್ಟು ಬೇಡಿಕೆಯ ಕೇವಲ 20% ಮಾತ್ರ ಜಿಲ್ಲೆಯಿಂದ ಪೂರೈಕೆಯಾಗುತ್ತಿದ್ದು, ಉಳಿದ 80% ಕಾಸರಗೋಡಿನಿಂದ ಬರುತ್ತಿದೆ.
ಜಾಹೀರಾತು
ಎರಡನೆಯದಾಗಿ, ಹೊಸ ಪರ್ಮಿಟ್ ನೀತಿಯಿಂದಾಗಿ ಕಾಸರಗೋಡಿನಿಂದ ಕಲ್ಲು ತರುವುದು ಮೊದಲಿಗಿಂತ ದುಬಾರಿಯಾಗಿದೆ. ಸಾಗಾಟ ದೂರ ಹೆಚ್ಚಾದಂತೆ ಕಲ್ಲಿನ ದರವೂ ಹೆಚ್ಚುತ್ತದೆ. ಮೂರನೆಯದಾಗಿ, ಕಲ್ಲು ಕತ್ತರಿಸುವ ಖರ್ಚು, ಲೋಡ್, ಅನ್ ಲೋಡ್, ಗಾಡಿ ಬಾಡಿಗೆ ಮತ್ತು ಇತರ ನಿರ್ವಹಣಾ ವೆಚ್ಚಗಳು ಏರಿಕೆಯಾಗಿವೆ. ಇವೆಲ್ಲವೂ ಸೇರಿ, ರಾಜಸ್ವ ಇಳಿದಿದ್ದರೂ, ಕೆಂಪು ಕಲ್ಲಿನ ದರವನ್ನು ಹಿಂದಿನ ಮಟ್ಟಕ್ಕೆ ಇಳಿಸಲು ಸಾಧ್ಯವಾಗುತ್ತಿಲ್ಲ ಎಂದು ಕಲ್ಲು ಪೂರೈಕೆದಾರರು ಹೇಳುತ್ತಿದ್ದಾರೆ.
ಪುತ್ತೂರು, ಸುಳ್ಯ, ಬಂಟ್ವಾಳ ಮತ್ತು ಬೆಳ್ತಂಗಡಿ ಭಾಗಗಳಿಗೆ ಕಾಸರಗೋಡು ಜಿಲ್ಲೆಯ ಮಿಂಚಿಪದವು, ಕಾಯರ್‌ಪದವು ಭಾಗಗಳಿಂದ ಹೆಚ್ಚಿನ ಪ್ರಮಾಣದ ಕಲ್ಲು ಬರುತ್ತದೆ. ಪ್ರಸ್ತುತ, ಪುತ್ತೂರು ಭಾಗದಲ್ಲಿ ಒಂದು ಕಲ್ಲಿನ ಬೆಲೆ ಸುಮಾರು 40 ರೂ.ಗಳಿಗೆ ಬಂದು ನಿಲ್ಲುತ್ತದೆ. ಹೀಗಾಗಿ, ದಕ್ಷಿಣ ಕನ್ನಡದಲ್ಲಿ ಕೆಂಪು ಕಲ್ಲಿನ ಸಮಸ್ಯೆ ಬಗೆಹರಿಯದೆ, ಮನೆ ನಿರ್ಮಿಸಲು ಹೊರಟವರ ಜೇಬಿಗೆ ಕತ್ತರಿ ಬೀಳುತ್ತಲೇ ಇದೆ.
ಜಾಹೀರಾತು
