ಲಖನೌ: ”ಕಾಂಗ್ರೆಸ್‌, ಸಮಾಜವಾದಿ ಪಕ್ಷದ ನಾಯಕರು ಸೇರಿದಂತೆ ಪ್ರತಿಪಕ್ಷಗಳ ಮುಖಂಡರು ತಮ್ಮ ಕುಟುಂಬದ ಹಿತಕ್ಕಾಗಿ, ಮಕ್ಕಳ ಭವಿಷ್ಯ, ತಮ್ಮ ಅಧಿಕಾರ ಮುಂದುವರಿಕೆಗಾಗಿ ಕೆಲಸ ಮಾಡಿದರೆ ಸ್ವಂತ ಮಕ್ಕಳಿಲ್ಲದ ಮೋದಿ ಹಾಗೂ ಯೋಗಿ (ಉತ್ತರ ಪ್ರದೇಶ ಸಿಎಂ ಯೋಗಿ ಆದಿತ್ಯನಾಥ್) ದೇಶದ ಜನರ, ದೇಶದ ನೂತನ ಪೀಳಿಗೆಯ ಯುವ ಜನರ ಅಭ್ಯುದಯಕ್ಕಾಗಿ ಕೆಲಸ ಮಾಡುತ್ತಿದ್ದಾರೆ,” ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ.
ಉತ್ತರ ಪ್ರದೇಶದ ಇಟಾವಾದಲ್ಲಿ ಬಿಜೆಪಿ ಚುನಾವಣಾ ರಾಲಿಯಲ್ಲಿ ಮಾತನಾಡಿದ ಪ್ರಧಾನಿ ಮೋದಿ ಅವರು, ”ಕಳೆದ 10 ವರ್ಷಗಳ ಆಡಳಿತದಲ್ಲಿ ಎನ್‌ಡಿಎ ಸರಕಾರ ಮುಂದಿನ ಒಂದು ಸಾವಿರ ವರ್ಷಗಳ ಕಾಲ ಭಾರತ ‘ಸೂಪರ್‌ ಪವರ್‌’ ದೇಶವಾಗಿ ಉಳಿಯುವುದಕ್ಕೆ ಅಡಿಪಾಯ ಹಾಕಿದೆ,” ಎಂದು ಹೇಳಿದರು.
ದೇಶದ ಹಿತಕ್ಕಾಗಿ ಮೋದಿ ಕೆಲಸ ಮಾಡುತ್ತಿದ್ದಾರೆ. ಮೋದಿ ಇರಲಿ ಬಿಡಲಿ ಮುಂದಿನ ಸಾವಿರ ವರ್ಷ ಕಾಲ ಭಾರತ ಸುಭದ್ರವಾಗಿ ಉಳಿಯಲಿದೆ. ಆದರೆ, ಪ್ರತಿಪಕ್ಷಗಳ ನಾಯಕರ ರಕ್ತದ ಕಣಕಣದಲ್ಲೂ ಕುಟುಂಬ ಪ್ರೇಮ ತುಂಬಿದೆ. ಪ್ರಸಕ್ತ ಚುನಾವಣೆಯಲ್ಲಿ ಕುಟುಂಬದ ಮಕ್ಕಳ ಶ್ರೇಯೋಭಿವೃದ್ಧಿಗೆ ಒಗ್ಗೂಡಿ ಹೋರಾಟ ಮಾಡುತ್ತಿವೆ,” ಎಂದು ಮೋದಿ ವಾಗ್ದಾಳಿ ನಡೆಸಿದರು.
ಜಾಹೀರಾತು
10 ವರ್ಷದ ಆಡಳಿತದಲ್ಲಿ ಮೋದಿ ಹೊಸ ಪರಂಪರೆ ಸೃಷ್ಟಿಸಿದ್ದಾರೆ. ಭವಿಷ್ಯದಲ್ಲಿ ಸಾಮಾನ್ಯ ಜನರ ಮಕ್ಕಳು ದೇಶದ ಪ್ರಧಾನಿಯಾಗಬೇಕು. ರಾಜಮನೆತನದ ವಾರಸುದಾರರಿಗೆ ಮಾತ್ರ ಪ್ರಧಾನಿ ಸ್ಥಾನ ಮೀಸಲಲ್ಲ. ಸಾಮಾನ್ಯರು ಪ್ರಧಾನಿ ಆಗಬಹುದು ಎಂಬುದನ್ನು ಚಾಯ್‌ವಾಲಾ ತೋರಿಸಿಕೊಟ್ಟಿದ್ದಾರೆ,” ಎಂದು ಮೋದಿ ಹೆಮ್ಮೆ ವ್ಯಕ್ತಪಡಿಸಿದರು.
ಬಡವರಿಗೆ ಸೂರು, ಮಹಿಳೆಯರ ಗೌರವ ಕಾಪಾಡಲು ಶೌಚಾಲಯ, ಮನೆ ಮನೆಗೂ ನಲ್ಲಿ ಮೂಲಕ ನೀರು, ಗ್ಯಾಸ್‌ ಸಂಪರ್ಕ, ವಿದ್ಯುತ್‌ ಸಂಪರ್ಕ ಕಲ್ಪಿಸುವ ಮೂಲಕ ದೇಶದಲ್ಲಿ ಮೋದಿ ಅಭಿವೃದ್ಧಿ ಪರಂಪರೆ ಸೃಷ್ಟಿಸಿದ್ದಾರೆ,”ಎಂದು ವಿವರಿಸಿದರು.
ಜಾಹೀರಾತು
ಜಾಹೀರಾತು
